19
Raris Gubernur Pilatus nikain para prajurite mangda mecutin Hyang Yesus.
2 Sasampune kenten tentarane punika ngulat gelungan sane malakar aji carang kayu sane madui tur kasalukin ring prabun Hyang Yesuse.
Kenten pada Ida kasalukin jubah mawarna ungu sekadi jubah raja.
3 Raris ipun jeg pragat nampekin Hyang Yesus lan mabaos sapuniki,
“Salam wih rajan anak Yahudine!”
Irika raris ipun sami namplak prarain Hyang Yesuse.
4 Gubernur Pilatus medal malih saha mabaos kapining anake akeh sapuniki,
“Cingakin ja!
Anake puniki bakta tiang medal ring arepan jerone sami,
mangdane jerone uning asiki ja nenten panggihin tiang kaiwangan Anake puniki.”
5 Raris Hyang Yesus medal nganggen gelungan dui lan jubah mawarna ungu.
Gubernur Pilatus raris mabaos kapining ipun sami sapuniki,
“Cingakin ja Anake puniki!”
6 Ritatkala para pemimpin rsi lan para tukang jaga Genah Agung Mabaktine nyingakin Hyang Yesus,
irika ipun masuryak sapuniki,
“Salibang ja Anake ene,
salibang ja Anake ene!”
Gubernur Pilatus raris mabaos kapining ipun sami sapuniki,
“Ambil ja Anake puniki,
jerone kamanten sane nyalibang;
asiki ja tiang nenten manggihin kaiwangan Iane.”
7 Raris para pemimpin Yahudine punika masaur sapuniki,
“Manut ukum agaman tiange,
Anake puniki musti kaukum padem krana Ia ngaku dados Putran Sang Hyang Pengardi.”
8 Ritatkala mirengin baos ipune sami,
irika Gubernur Pilatus ngancan jejeh.
9 Raris ida mawali ka jeroan tur Hyang Yesus taler kabakta mrika.
Raris ida mataken kapining Hyang Yesus sapuniki,
“Uli dija asal Ragane?”
Nanging Hyang Yesus nenten masaur.
10 Raris Gubernur Pilatus mabaos sapuniki,
“Apa ngranayang Ragane tusing nyautin tiang?
Apake Ragane tusing nawang yening tiang ngelah kuasa buat mebasang miwah nyalibang Ragane?”
11 Hyang Yesus raris ngandika sapuniki,
“Yening Sang Hyang Pengardi nenten ngicen kuasane punika kapining jerone,
pastika jerone nenten madue kuasa kapining anggan Tiange.
Punika mawinan anake sane nyerahang Tiang sid jerone,
anake punika sane malaksana dosa sane agengan kapining jerone.”
12 Ritatkala Gubernur Pilatus mirengin sekadi punika,
ida ngutsahayang mangda Hyang Yesus kabebasang.
Nanging para pemimpin Yahudine masuryak sapuniki,
“Yening iratu mebasang Anake punika,
iratu nenten ja masawitra sareng Kaisar!
Krana anake sane ngaku deweknyane raja,
ipun musuh Kaisar Roma!”
13 Ritatkala Gubernur Pilatus mirengin baos sekadi punika,
ipun makta Hyang Yesus medal tur gubernure malinggih ring singasana pengadilane.
Genahe punika mawasta “Natah Batu” nanging ring basa Ibrani kasambat “Gabata”.
14 Duk punika,
makire jam roras tengaine sadereng rarainan Paskah.
Gubernur Pilatus raris mabaos sapuniki,
“Niki rajan jerone!”
15 Ipun sami raris masuryak sapuniki,
“Matiang ja Ia!
Matiang ja Ia!
Salibang ja Ia!”
Gubernur Pilatus raris mataken sapuniki,
“Apake tiang musti nyalibang rajan ragane?”
Para pemimpin rsine masaur sapuniki,
“Wantah Kaisar kamanten rajan tiange!”
16 Irika raris Gubernur Pilatus nyerahang Hyang Yesus kapining ipun sami mangda kasalibang.
Hyang Yesus Kasalibang
Raris para tentarane makta Hyang Yesus medal.
17 Irika Ida negen kayu salib Idane nuju genah sane mawasta Genah Tengkorak,
nanging ring basa Ibrani kasambat “Golgota”.
18 Irika Ida kasalibang.
Duk punika,
wenten pada kalih anak jaat sane kasalibang maririgan sareng Ida:
sane siki ring kenawan lan sane malih siki ring kebot,
tur Hyang Yesus ring tengah-tengah.
19 Raris Gubernur Pilatus nunden anak mangda masang tulisan ring kayu salib Idane sapuniki,
“Yesus saking Desa Nasaret,
Rajan anak Yahudi.”
20 Akeh anak Yahudine ngwacen tulisane punika krana genah Idane kasalibang nampek ring kota.
Tulisane punika nganggen basa Ibrani,
basa Latin,
miwah basa Yunani.
21 Para pemimpin rsine anak Yahudine mabaos kapining gubernur Pilatus sapuniki,
“Sampunang ja katulis ‘Rajan anak Yahudi’,
nanging tulis ja ‘Anake puniki ngaku Rajan anak Yahudi.’”
22 Nanging gubernur Pilatus masaur sapuniki,
“Napi sane sampun katulis nenten jagi ubah tiang.”
23 Sasampune para tentarane nyalibang Hyang Yesus,
ipun sami ngambil penganggen Idane.
Penganggene punika kaedum sareng papat:
sebilang diri polih abagian.
Ipun sami pada ngambil jubah Idane.
Jubahe punika alembar,
nenten majait,
tur matenun saking baduur kantos beten.
24 Irika para tentarane saling ngraos sapuniki,
“Eda ja getep-getepe jubahe ene;
lan ja undi apanga tawang nyen sapatutne ane makatang!”
Indike punika yakti mamargi pateh sekadi sane sampun katulis ring Cakepan Sucine sapuniki,
“Ipun sami ngedum penganggen Tiange,
Lan ngocok ngundi buat ngedum jubah Tiange.”
Kidung 22:19
Tur yakti para tentarane malaksana sekadi punika.
25 Nampek ring genah Hyang Yesuse kasalibang,
irika ngadeg ibun Idane,
semeton ibun Idane,
lan Maria istrin I Klopase,
sareng Maria saking Kota Magdala.
26 Hyang Yesus nyingakin ibun Idane lan asiki sisia sane kasayangin Idaa ngadeg irika.
Raris Ida ngandika kapining ibun Idane sapuniki,
“Ibu,
ene pianak Ibune.”
27 Raris Hyang Yesus ngandika kapining sisiane punika sapuniki,
“Ene ibun ragane.”
Ngawit paindikane punika,
sisiane punika nerima ibun Hyang Yesuse meneng ring umahnyane.
Hyang Yesus Seda
28 Hyang Yesus uning makasamine sampun puput.
Lan mangdane mamargi napi sane katulis ring Cakepan Sucine,
irika Ida ngandika sapuniki,
“Tiang bedak.b”
29 Irika wenten guci sane bek madaging anggur masem.
Salah tunggal anake irika ngambil entik-entikan sekadi gabus tur ngencebang ring anggure punika,
raris kaunggahang ring cangkem Hyang Yesuse nganggen entikan hisopc.
30 Sasampune Hyang Yesus nyicipin anggure punika,
Ida raris ngandika sapuniki,
“Sampun puput.”
Lan Ida nguntul,
raris seda.
Lambung Hyang Yesuse Katebek
31 Duaning dinane punika makire rahina Sabat sane matumpuk sareng rarainan Paskah anak Yahudine,
para pemimpin Yahudine nenten kayun yening anake sane kasalibang kari magantung irika.
Punika mawinan makudang para pemimpin Yahudi nunas ring Gubernur Pilatus mangda batis anake sane kasalibang punika kaelung mangda gelis padem tur sawannyane katedunang.
32 Raris rauh para tentarane jagi ngelung batis anake sane kasalibang ring kebot lan ring kenawan Hyang Yesuse.
33 Ritatkala tentarane jagi ngelung cokor Hyang Yesuse,
tentarane manggihin Ida sampun seda.
Punika mawinan ipun nenten ngelung cokor Idane.
34 Nanging adiri saking tentarane punika nebek lambung Hyang Yesuse nganggen tumbak tur pramangkin mawetu rah lan toya.
35 Anake sane nyingakin paindikane punika dados saksi,
turmaning kasaksian ipune patut.
Ipun uning pada indike punika yakti patut.
Ortine punika kaceritayang mangda jerone pracaya.
36 Makasamine punika yakti mamargi pateh sekadi sane sampun katulis ring Cakepan Sucine sapuniki,
“Nenten wenten tulang Idane jagi kaelung.” Pararudan 12:46; Cacah Jiwa 9:12; Kidung 34:21
37 Turmaning wenten pada sane katulis sapuniki,
“Ipun sami jagi nyingakin Ida puniki Anak sane tebek ipun.” Sakaria 12:10
Hyang Yesus Kapendem
38 Sasampune kenten,
wenten adiri sane mapesengan Yusup saking Kota Arimatea.
Ipun ngiring Hyang Yesus,
nanging silib-silib krana takut kapining pemimpin Yahudine.
Ipun tangkil ring Gubernur Pilatus jagi nunas mangda nedunang layon Hyang Yesuse.
Sasampune pinunas ipune kadagingin olih Gubernur Pilatus,
ipun luas tur nedunang layon Hyang Yesuse.
39 Kenten pada rauh dane Nikodemus,
anak sane taen rauh ring Hyang Yesus ritatkala wengi.
Yohanes 3:1-2 Dane makta raracikan minyak mur lan minyak gaharu kirang langkung telung dasa (30) kilo.
40 Makakalih anake punika ngambil layon Hyang Yesuse mangda kakaput nganggen kasa.
Ipun pada ngaminyakin layon Idane nganggen raracikane manut budaya anak Yahudine mendem sawa.
41 Nampek saking genah Hyang Yesuse kasalibang wenten taman.
Ring tamane punika wenten kuburand gua sane anyar.
Kuburane punika nenten taen kaanggen.
42 Irika layon Hyang Yesuse kagenahang krana kuburane punika nampek turmaning dinane punika makire rahina Sabat.